من كام سنه يجي تلت اربع سنين كدة ايام ما كُنت لسة في الثانوية كنت شاب عادي زي باقي الشباب .. بيحلم يخلص مذاكرة ويخلص بقا من الثانوية العامة ويهرب ويدخل الكلية عشان يستريح .. في الاول انا كُنت علمي . بس الصراحة مكنتش فاضي لا للكميآ ولا لرياضية خاصة واحنا عندنا في المنوفية شبين النوم خصيصاً .. كان لسة جو البلاستيشن والانترنت بدأ يشتغل عندنا لأننا طبعاً من البلاد المُتأخرة وجو السيبرات بقا وخط النت ابو 140 جنية في الشهر 265 سرعات فائًقة وكان الى يقعد نت نص ساعه يبقى واد ايييية واحنا كان عندنا سيبر والدنيا كانت زحمه بقا ومكنش في وقت للمذاكرة المهم السنة خلصت
وجيبت بلا منازع تلاته وتمانين في المية والعائلة كلها عندنا كانت مخمومة ال يعني الواد هيطلع دكتـووووووووور بس انا ولا كان في بالي المُهم زي الشاطر وزي كتير من صحابي قومت محول من علمي لأدبي ال يعني هنفع المهم قضيت السنة التانية من الثانوية العامة برضة رايح وجاي وهنا وهنا لحد ما جيت على نهاية السنة كدة وبدأت اشد على نفسي قوي قوي قوي لحد ما جيبت في الاخر حاجه وتسعين في تالتة وبقا مجموع السنتين سبعه وتمانين ولا حاجه والحمد لله خدت بعضي ودخلت كلية تجارة جامعة المنوفية عدل ومن غير نقاش على اساس اني هستريح بقا من جو الثانوية العامة والمذاكرة والكلام دا
بس للاسف يا ريتك يا ابو زيت ما غذيت ولقتني زي كتير من الناس بدل ما بدأت استريح لا بدأت ادخل لجو ثانوية عامة اجمد من الى فاتت
ولقيت ان جملة تجارة المنوفية من اصعب الكليات على مستوى الجمهورية مش مُجرد اشاعة ولا جملة عادية لا فعلا دي حقيقة ومش اي حد ربنا قدرة ودخل كلية تجارة شبين الكوم هيقدر يكمل فيها زي كتير من صحابي برضة الى كان جايب حاجه وسبعين ودخل تجارة انتساب ولما وقع في سنة اولى ولقى نفسة مش هيقدر يكمل حول كلية تانية ... الخ
فمن هنا بدأت الملم نفسي شوية واحاول اذاكر والحمد لله قدرت اعدي اول سنة وتاني سنة واديني اهو في تالت سنة طبعاً لاني واحد من الناس الى مش بقينا فاضيين للمذاكرة والى بتشغلهم حاجاات كتير عن الجامعة وحضورها وسكاشنها ومحاضرتها وشيتاتها ودكاترها ومُعيدنها وطالبها وطالبتها وطبعا من اول ما دخلت سنة اولى وانا بحاول احفظ اسماء الدكاترة ولكن من المع الدكاترة الى قابلتهم والى غني عن التعريف الدُكتورة سُهير حسن الله يكرمها ودي تعُتبر مِن اكفأ خمس دكاترة بعتذ باني حضرتلها اي نعم انا شيلت المادة بتاعتها في سنة اولى الترم الاول والمادة بتاعت الترم التاني كمان وطلعت سنة تانية بيهم وعديت فيهم طبعاً لأن دكتور تاني الى كان بيديهالنا بس للأسف برضه في تانية شيلت مادة الترم الاول ومادة الترم التاني بتاعت الدكتورة سُهير بس مع ذلك انا بعشق حاجه اسمها الاقتصاد مع الدكتورة سُهير مش عشان خبرتها الكبيييييييييرة ولا عشان طريقة شرحها للمادة لاْء بس الاهم انها فعلا بتكون ديماً قريبة من الواقع في امتحاناتها والى بيميز امتحانات الدكتورة سُهير في جامعة المنوفية خصيصاً انها مش بتخاطب العقول الصغيرة ولا الى مذاكر نص نص او حتى الي حافظ المادة صم لاا مش حفظ بس ولا فهم بـس انما امتحانتها ببتقى للي حافظ وفاهم في نفس ذات الوقت والى ديماً بيميز امتحاناتها انها ممكن تجيب من السنين الى فاتت يعني حضرتك درست في اولى وتانية وتالتة اقتصاد !! يبقى في رابعه معاك الدكتورة سُهير ممكن تجيبلك اسئله من سلأونة وانت مُطالب بيه رغم ان في ناس كتير بتكره الموضوع دا وانا اولهم بس بجد بعشق حاجه اسمها الدكتورة سُهير وربنا يديها الصحة واتجوز واخلف وتكون لسة بتدرس وولادي يتعلموا على ايديها. وطبعاً في دكاترة تانية كتير برضة بعشقهم وناس كتير مش فهماهم ولا فاهمه امتحانتهم زي الدكتور سيد طه ربنا يديله الصحة والاستاذ الدكتور امجد عمارة . والميتم والدكتور احمد اللحلح والدكتورة ثناء والدكتور احمد عبد الفتاح ودكاترة كتييييييير انا بعشقهم بجد وربنا يديهم الصحة ويفضلوا يدرسوا لأنهم بجد بيتعبوا جدا ولولاهم مكنتش هتبقى تجارة المنوفية بهذا المستوى ومن اهم المُعيدين الى ليهم صيت لامع طبعا استاذي الكبير عصام عبدالله الى بعتبره من اقوى خمس مُعيدين بكلية تجارة المنوفية شخصيات كتير ليها السبب في جعل جامعتنا بهذا المستوى الراقي والى الجميع بيشهد بأنها من اقوى الجامعات والى بيتخرج منها اكيد مطلوب
وربنا يوفقك الجميع والي اللقاء اخواني في حكاية جديدة من حكايتي
التوقيع :
إنضم الآن لأقوى تجمع لشباب وبنات جامعة المنوفية ..
السبت يوليو 03, 2010 6:15 pm
